Улмаар инфляцид хамгийн ихээр өртсөн хөгжиж буй орнууд давхар ханшийн алдагдал үүрч байгаа нь гадаад өрийн эрсдэлийг улам нэмэгдүүлсээр байна. Тухайлбал, хөгжиж буй орнуудын 25 хувь, бага орлоготой орнуудын 60 хувь нь дефолт зарлах эрсдэлтэй гэж тооцсон.  

Тэгвэл манай улс оны эхнээс инфляц 10.9 хувь, төгрөгийн эсрэг ам.долларын ханш 16.5 хувиар нэмэгдэж, гадаад валютын нөөц 36.2 хувиар агшсан дүр зурагтай байна.   

ОУВС-гийн тэргүүн Кристалина Георгиева өнгөрсөн долоо хоногт “APEC”-ын чуулга уулзалтад оролцох үеэрээ хөгжиж буй орнуудын өрийн эрсдэлийг “хараахан сандрах хэмжээнд хүрээгүй ч сэрэмжлэх түвшинд байгаа” гэж тодорхойлсон юм. Улмаар тэрээр ам.доллараар илэрхийлэгдэх гадаад өрийн дарамтад орсон улс орнуудад хандан урьдчилсан сэргийлэх арга хэмжээ авч, шаардлагатай тохиолдолд ОУВС-гаас эртхэн тусламж хүсэж, хөтөлбөрт хамрагдахыг уриалжээ.

Хамгийн сүүлд, гадаад валютын нөөцийн хомсдолд ороод байгаа Бангладеш улс энэ сарын эхээр ОУВС-гийн 4.5 тэрбум ам.долларын хөтөлбөрт хамрагдсан.