Хүнс хөдөө аж ахуй хөнгөн үйлдвэрийн дэд сайд Ж.Бат-Эрдэнийг 48 цаг цагдан хорьсон талаар бид мэдээлсэн. Түүнтэй холбоотой цагдан хорих шүүх хурал өнгөрөгч долоо хоногт болсон ч тэрбээр шүүгчээсээ татгалзсан тул хурал болоогүй байна.

Иймээс түүнд холбогдох таслан сэргийлэх хурал удахгүй болох аж. Хэргийг тодруулбал, Дарханы замын тендертэй холбоотой бусдад давуу байдал олгосон, үндэслэлгүй хөрөнгөжсөн гэх асуудлаар шалгаж буй юм. Харин түүний дүү УИХ-ын гишүүн асан Ж.Батзанданг Баянзүрх, Сүхбаатар, Чингэлтэй дүүргийн эрүүгийн хэргийн анхан шатны шүүхийн шийдвэрээр 30 хоног цагдан хорих шийдвэрийг гаргасан юм.

Хэргийг эргэн сануулбал, Ж.Батзандан УИХ-ын гишүүнээр ажиллаж байх хугацаандаа өөрийн туслах Г.Аюулгүйгээр дамжуулан Хөгжлийн банкнаас зээлдэгч Капитал банкнаас зээл авсан байж болзошгүй хэрэгт шалгагдаж байна. Ингэхдээ тус банкнаас авсан 12.6 тэрбум төгрөгийн эргэн төлөлтийг хийгээгүй гэх үндэслэлээр хуулийн байгууллагад шалгагдаж байгаа юм.