УИХ-ын нэгдсэн чуулганаар яг одоо Төрийн болон орон нутгийн өмчит компанийн тухай хуулийн төсөл болон хамт өргөн мэдүүлсэн хуулийн төслүүдийн хэлэлцэх эсэх асуудлыг хэлэлцэж байна. Хууль санаачлагч ХЗДХ-ийн сайд Х.Нямбаатар төрийн өмчит компаниудын ТУЗ болон гүйцэтгэх удирдлагыг томилох асуудалд энэ хуулиар ямар өөрчлөлт оруулах гэж байгаа талаараа тодорхой мэдээлэл өглөө.

Тэрбээр "Төрийн болон орон нутгийн өмчит газруудын ТУЗ, гүйцэтгэх удирдлагыг нээлттэй сонгон шалгаруулалтаар авна. Мөн төрийн өмчит компанийг хоёр жил дараалан алдагдалтай ажиллуулсан гүйцэтгэх удирдлага, ТУЗ-ийг чөлөөлнө. Дараа нь өөр төрийн өмчит компани дээр гүйцэтгэх удирдлага, ТУЗ-д томилогдох боломжийг хааж, бүртгэлийн нэгдсэн систем хөтөлнө" гэсэн юм.

Өөрөөр хэлбэл, Төрийн өмчийн тухай хууль орж ирсэн төслийнхөө дагуу батлагдвал төрийн өмчит компанийг хоёр жил алдагдалтай ажиллуулсан ТУЗ, гүйцэтгэх удирдлагууд ажлаасаа шууд чөлөөлөгдөх юм байна. Мөн дахин өөр төрийн өмчит компани, аж ахйун нэгжүүдэд томилогдохгүй байхаар хуулийн төсөлдөө тусгажээ.