УИХ-ын чуулганы 2023 оны арваннэгдүгээр сарын ирцийн мэдээ гарчээ. Тодруулбал, өнгөрсөн сард УИХ 10 удаа хуралджээ. Гишүүдээс Н.Алтанхуяг, Х.Баделхан, Б.Бат-Эрдэнэ, С.Бямбацогт нарын 16 гишүүн хуралдаа бүрэн буюу 10 удаа суусан байна.

УИХ-ын гишүүн, Ерөнхий сайд Л.Оюун-Эрдэнэ нэг удаа чуулганы хуралдаанд оролцжээ. Харин УИХ-ын гишүүн Ц.Анандбазар, Ц.Сэргэлэн хамгийн их буюу дөрвөн удаа чуулганы хуралдааныг тасалсан бол Ж.Батсуурь, Ц.Идэрбат, Ш.Раднаасэд гурван удаагийн таслалтаар удаалжээ.

Чуулганы хуралдаанаас хамгийн олон удаа хоцорсон гишүүн нь С.Батболд. Түүний араас Д.Ганбат, Ж.Эрдэнэбат гишүүн бичигдсэн байна.

Өнгөрсөн сард Д.Өнөрболор болон Н.Энхболд гишүүн хамгийн олон буюу таван удаагийн гадаад томилолтын улмаас хуралдаа оролцоогүйг гэв.

Шүүхээс Хөгжлийн Банкны гэх эрүүгийн хэрэгт гэм буруутайд тооцогдсон УИХ-ын гишүүн Ё.Баатарбилэгт нэг жилийн хугацаагаар хорих ял оноосон. Тэрбээр ирцийн бүртгэлд "чөлөөтэй" хэмээн бичигджээ.