Африк тивийн зарим улс орнуудад коронавирусийн шинэ мутаци “омикрон” хэмээх вирус илэрсэн. Үүнээс сэргийлэхээр манай улс ямар арга хэмжээ, стратеги төлөвлөн ажиллаж байгаа талаар УОК-ын Шуурхай штабын дарга, генерал Б.Ууганбаяраас тодрууллаа.

-“Омикрон” вирус бүртгэгдсэн улс оронд амьдардаг эсвэл эдгээр орноор дамжин өнгөрсөн Монгол Улсын иргэдийг эх орондоо ирэх үед 10 хоногийн хугацаатай тусгаарлахаар болсон. Тусгаарлалтын зардлыг тухайн иргэн өөрөө хариуцах бөгөөд тусгаарлалтад байх хугацаанд хоёр удаагийн PCR шинжилгээ авна.

-УОК-ын Нэгдсэн шуурхай штабаас иргэдийг 17 нэр бүхий зочид буудлыг түшиглэн тусгаарлах бэлтгэлийг хангасан. Үүнд, Кентавр, Наранбулаг, Зүчи, Мөнххустай, Тайж, Амар, БиЖи, Намуун, Монголика, Альфа, Ворд Монголиа, Багабаян цогцолборт хоногийн 0-3 насны хүүхэд төлбөргүй, 04-16 насны хүүхэд 50.000 төгрөг, 17-оос дээш настай бол 100.000 төгрөгийн үнэтэй тусгаарлана.

Тухайн иргэд өөрийн хүсэлтээр Кемпенски, Туушин, Новотел, Ибис, Стайлс, Улаанбаатар, Рамада зэрэг нэмэлт төлбөртэй зочид буудалд тусгаарлагдаж болно.

-Сүүлийн үед иргэд гадаад орнуудад аялж зугаалах нь ихэсч байна. Тухайлбал, Турк, Тайланд, Тайвань зэрэг орнуудад ихээр зорчиж байгаа тул ЭМЯ, ХӨСҮТ-ээс анхааруулсан “Омикрон” вирус илэрсэн улс орнуудад зорчихгүй байх, дамжин өнгөрөхгүй байхыг анхаарах хэрэгтэй.

Нөхцөл байдлаас шалтгаалан тухайн улс орны Засгийн газар хилээ хаах, агаарын тээврийн хөдөлгөөнийг зогсоох, хязгаарлаж болзошгүй. Иймд иргэд тухайн улс оронд тодорхойгүй хугацаагаар хязгаарлалтад орж болзошгүйг анхаарч эрсдлээ тооцож, гадаад улс оронд зорчихгүй байхыг сэрэмжлүүлж байна.