2021 оны 10 дугаар сарын 1-ний өдөр буюу Олон Улсын Ахмадын баярын өдөр. Жил бүрийн энэ өдөр улс эх орныхөө хөгжлийн төлөө зүтгэсэн ахмад буурай нартаа хүндэтгэл үзүүлдэг уламжлалтай. Тэгвэл энэ жилийн хүрээнд Баянзүрх дүүргийн ахмадууд үр хойч, ирээдүйн байгаль дэлхийн сайн сайхны төлөө Үндэсний цэцэрлэгт хүрээлэнд мод тарьлаа.

Уг ажлыг Баянзүрх дүүргийн 17 дугаар хорооны Засаг дарга, Ахмадын холбооны дарга нар санаачлан хэрэгжүүлсэн бөгөөд мод тарих ажлын үеэр 17 дугаар хорооны Засаг дарга Цэрэнмаа хэлэхдээ "Өнгөрсөн он жилүүдэд ахмад настай буурайнуудад төр засаг, холбогдох удирдлагууд хүндэтгэл үзүүлж, эх орны төлөө өдий хүртэл зүтгэж байгаад талархал илэрхийлдэг. Тэгвэл энэ жилийн хүрээнд дүүргийн ахмадууд маань хамтарч эх орныхоо сайн сайхан, ирээдүйн төлөө одоо хүртэл зүтгэхэд бэлэн гэдгээ ойлгуулахын тулд ийнхүү мод тарьж байна" гэсэн юм.

Ахмадуудын зүгээс ч мөн адил бид үргэлж эх орон, ирээдүйн сайн сайхны төлөө санаагаа чилээж, зүтгэсээр ирсэн. Биднийг голохгүй бол цаашид ч бид зүтгэж, хамтарч чадна гэсэн юм.

Мөн "Ахмадын баяр"-ыг тохиолдуулж Баянзүрх дүүргээс сонгогдсон УИХ-ын гишүүн Э.Бат-Амгалан дүүрэгтээ "Ахмадын Өргөө" барихаа мэдэгдсэн. Тэрээр хэлэхдээ

"Баянзүрх дүүргийн хувьд өнөөдрийн байдлаар 42000 гаруй ахмадууд аж төрж, амьдран суудаг хэдий ч тэдний дуу хоолойг төрийн анхан, дунд, дээд шатанд хүргэх, чөлөөт цагийг нь зөв боловсон өнгөрүүлэх, залуу үеэ дэмжиж ажиллахад хамтрах "Ахмадын Өргөө" байхгүй. Харин бусад дүүргүүдэд 1-2 байдаг. Тиймдээ ч "Ахмадын өргөө"-г барьж байгуулах болсон" гэж Баянзүрх дүүргийн ИООНХХ-ээс мэдээллээ.