Баянзүрх дүүргийн 26 дугаар хорооны нутаг дэвсгэрт гарсан галд өртсөн арван хүн ГССҮТ-ийн салбар эмнэлэг Түлэгдлийн төвд эмчлүүлж байна. Түлэгдсэн иргэдийн бие ямар байгаа талаар ГССҮТ-өөс тодруулахад, Арван хүний тав нь Эрчимт эмчилгээний тасагт, тав  нь Түлэнхийн тасагт эмчлүүлж байсан бол энгийн тасгаас дахин нэг хүнийг Эрчимтийн тасагт шилжүүлсэн.  

Одоогоор Түлэнхийн тасагт дөрөв, Эрчимт эмчилгээний тасагт зургаан хүн эмчлүүлж байна. Хүмүүсийн биеийн байдал хэвэндээ, эмчилгээ үргэлжилж байна гэлээ. Галд өртсөн гурван иргэний бие маш хүнд байна. Бүх биеийнх нь 80-90 хувь түлэгдсэн. Хоёр иргэний биеийн 35-45 хүвь нь түлэгдсэн маш хүнд байна. 

Таван иргэний бие хүндэвтэр, бүх биеийн 18-25 хувь нь түлэгдэлтэй. Эрүүл мэндийн салбарын боловсон хүчнээ дайчлан ажиллаж байна. Одоогоор тасалдсан эм, тариа байхгүй гэж Эрүүл мэндийн сайд С.Чинзориг өчигдөр /2024.01.24/ мэдээлсэн юм.