Хөгжлийн банкны найдваргүй зээлдэгчдийн дуулиан дэгдээд 20 гаруй хонолоо. Хөгжлийн банкнаас хэдэн арав, хэдэн зуун тэрбум төгрөгийн зээл авсан зээлдэгчдийн тухай сонссоор ард түмэнд тэрбум төгрөг таваг хоолны мөнгө шиг бага сонсогдох болов, энэ 20 хоногт. Хамгийн ноцтой нь, одоогоор Хөгжлийн банкнаас албан тушаалаа ашиглан их хэмжээний зээл аваад, эргүүлэн төлөөгүй буюу “хулгай хийсэн” хэрэгт 20 улстөрч нэр холбогдоод байна. Тодруулбал, УИХ-ын гишүүн долоо, УИХ-ын гишүүн асан ес, Ерөнхийлөгч асан нэг, дэд сайд асан хоёр, НИТХ-ын төлөөлөгч асан нэг тус тус Хөгжлийн банкны найдваргүй зээлдэгчдийн цаад эздээр нэрлэгдээд байна. Өмнө нь ЖДҮ-гийн дуулианд л ийм олон улстөрч нэг дор нэр холбогдож байлаа. Ялгаатай нь, Хөгжлийн банкны зээлдэгчдийг халим гэвэл ЖДҮ-гийн зээлдэгчид дэргэд нь жижиг жараахай төдий. Ухамсартай улстөрчидтэй улсад бол үүн шиг эмгэнэл үгүй биз.  

       Энэ жагсаалтад харагдаж байгаачлан Хөгжлийн банкны найдваргүй зээлдэгчдийн цаад эзэд ихэвчлэн МАН-ын харьяалалтай улстөрчид байгаа. Энэ ч утгаараа 30 дахь Их хурлаасаа хойш “Авлига, албан тушаалын гэмт хэрэгт нэр холбогдсон гишүүддээ хатуу хариуцлага тооцно” хэмээн ярих болж, өөрсдөдөө алга ташуулах болсон МАН Хөгжлийн банктай нэр холбогдсон гишүүддээ ямар хариуцлага тооцохыг ард түмэн хүлээж буй. Харамсалтай нь, МАН-ын хатуу тэмцэл нь одоогоор ЖДҮ-гийн зээл, Капитал банкны дампуурал дээрээ нэмж Хөгжлийн банкны найдваргүй зээлдэгч болсон УИХ-ын гишүүн асан Б.Ундармааг намаасаа хөөсөн төдийхнөөр зогсчихоод байна. Харин бусдад нь буюу дээр дурдсанчлан УИХ-ын гишүүн Г.Амартүвшин, Х.Ганхуяг, Г.Дамдинням, Ч.Ундрам, Ц.Анандбазар, С.Бямбацогт, Б.Баттөмөр, М.Билэгт, А.Сүхбат, Б.Элдэв-Очир, Ц.Гарамжав, Б.Эрдэнэбат, Ш.Үнэнбат нарын улстөрчдөдөө МАН ямар хариуцлага тооцох нь, намаасаа хөөх эсэх нь тодорхой бус байна. Хэрвээ цөмийг нь хөөвөл МАН-д ард түмний зүгээс асар их алга ташилт ирэх боловч эсрэгээрээ нам дотроо дайн дэгдээх эрсдэлтэй. Тиймдээ ч тэднийгээ хариуцлагаас хаацайлж, аргацаагаад өнгөрөөхийг оролдож байгаа дүр зураг тодорч байгаа.  

Түүнчлэн нөгөө талд АТГ-аас Хөгжлийн банкнаас зээл авсан 73 аж ахуйн нэгжийн цаад эздийг шалгаж эхэлснээ зарласан. Гэхдээ МАН дангаар шахуу ноёрхож буй энэ үед АТГ дангаараа Хөгжлийн банктай нэр холбогдсон МАН-ын угшилтай улстөрчдийг авлига, албан тушаалын хэргээр яллагдагчаар татна гэдэг хэцүү. Өөрөөр хэлбэл, одоогоор ил болоод байгаа мэдээллээр МАН-ын угшилтай 16 улстөрч Хөгжлийн банкны хэрэгт нэр холбогдчихсон явж байна. Нэг улс төрч бол шалгах арга нь олдоно, харин 16 улстөрчийн асуудал яригдаж буй үед АТГ-ын хүч хүрэх эсэх нь эргэлзээтэй. Тиймдээ ч АТГ-ын ахлах комиссар Ч.Жаргалбаатар “Улстөрчид өөрийн хамаарал бүхий этгээдэд зээл аваад өгчихсөн, албан тушаалаа урвуулаад ашигласан бол өөрөө ард түмнээс уучлал гуйгаад огцрох хэрэгтэй. Шударгаар хуулийн байгууллагад шалгуулах ёстой” гэж аргадах, албадах, ятгахын завсраар ярилцлага өгсөн байна билээ.  

          Ингээд харвал, Хөгжлийн банкны нийт активын талыг нь зээлээр авчихаад эргүүлж төлөөгүй найдваргүй зээлдэгчид, тэдний цаадах улстөрчдөд эрх баригч МАН хариуцлага тооцож чадахгүй, АТГ-ын хүч хүрэхгүй нөхцөл бүрдэж мэдэхээр байна. Хэрвээ ингэвэл Хөгжлийн банктай нэр холбогдсон улстөрчид ухамсраараа уучлал гуйгаад огцрохыг, өөрсдийгөө шалгуулахыг хүлээх ганц арга л ард түмэнд үлдэнэ гэсэн үг.